الحقو تــــامـــر حســـــنــــى بيتشتم؟

بجد الشاعر الكبير احمد فؤاد نجم ده راجل حكايه ......شوفو ازاى مهزق تامر حسنى فى كلامو
بس بصراحه عندو حق تعالو شوفو هو كاتب ايه؟ وان كان عندو حق ولا لاء تعالو

ماتيجي

بقلم احمد فؤاد نجم
المطرب الحنتوس الننوس عندليب الأيام السوداء مشحتف النساوين ومسهرهم لوش الصبح ورجالتهم -نايمين- يا ولداه (وإن غاب القط ألعب يا فار)، أنا لغاية وقتنا هذا ما سمعتوش يمكن لأني ماليش طقطان ويمكن قلة فضا ويمكن جهل مني والعياذ بالله.. لكن خلاصة الكلام أنا ما شفتهوش بيغني لا في المسرح ولا في التليفزيون. والمرة الوحيدة اللي شفته فيها ماكانتش في صالة لأنه كان واقف قدام القاضي زي الجدي اللي عامل عملة أو زي الفار المبلول لأنه كان متهماً بالتهرب من شرف الخدمة العسكرية وتزوير شهادة المعاملة العسكرية. وكان القاضي بيتصرف معاه بأبوة ورحمة وسعة صدر، وبعد ما لقنه درساً في الأدب والأخلاق أخلي سبيله وسط الزغاريد واتعملت في المحكمة زفة ولا أجعص عريس.. وصدقوني أنا كنت متعاطف معاه وفرحان بالقاضي اللي أصدر الحكم مغلفاً بالرحمة الأبوية علي شاب في مقتبل العمر، خصوصاً بعدما سمعت إن مطرب تاني -برضه ماسمعتهوش- هو اللي وز عليه ولفق له القضية من باب المنافسة الفنية! لغاية هنا حلو الكلام!، وإذا بي أفاجأ بصديقي «...» داخل علي وهو بيضرب كف علي كف، قلت له: خير اللهم اجعله خير.. فيه إيه؟

قال لي:

- قول فيه إيه ولاّ إيه ولاّ إيه!

قلت له:

- مالك؟

قال لي:

- مالي علي الله.

قلت له:

- ونعم بالله، فيه إيه ياعم! شحنتها قمح جات ملح؟

قال لي:

- ولا قمح ولا ملح.. هي كده نشفت وماتت قراميطها.. كل ما كان يكلمك تقول له أنا متفائل.. تقدر بقي تقول إيه اللي مخليك متفائل في الواقعة اللي احنا فيها دي؟

قلت له:

- هات م الآخر عشان ماتاكلش نافوخي.

قال لي:

- تامر حسني اللي هرب من الجيش وضرب شهادة معاملة مزورة وخد حكم مع إيقاف التنفيذ من باب الرحمة يختاروه هو بالذات عشان يغني في احتفالات القوات المسلحة في أعياد أكتوبر.. وذكري الشهداء؟

- مين اللي اختاره؟

ضحك وقال لي:

- مش أنا طبعاً.

قلت له:

- وانت مندهش ليه؟

قال لي:

- دا كده تبقي بتشجع الشباب علي الهروب من الجيش وضرب الأوراق الرسمية.

قلت له:

- الشباب مش ناقص تشجيع.. الشباب طافح الكوتة لأنه مهمش وعاطل عن العمل وغرقان في بحر اليأس ولا حول ولا قوة إلا بالله وبعدين ياسيدي اشمعني تامر حسني ما هي أي ممثلة بتتاخد في قضية دعارة مجرد ما يفرج عنها بتنهال عليها العروض الفنية من كبار المنتجين العرب وتنزل فينا تمثيل سينما علي مسرح علي مسلسلات تليفزيونية.. دا غير صورها اللي بتملا الصحف والمجلات الفنية.. دا غير استضافتها في البرامج التليفزيونية في جميع الفضائيات العربية.. وبعدين تتجوز أو ترافق رجل أعمال يجيب لها الشبح بسواقها.. وإذا نزلت من سماها علي أرضنا يحاصرها المعجبون بالأوتوجرافات عشان يسعدوا بتوقيعها الكريم.. والسعيد السعيد اللي تضرب له ابتسامة ع الماشي أو نظرة بنص عين وتبقي ضيفة «شرف» في كل المهرجانات والمؤتمرات الفنية لأنها اتمسكت ظلم.

وضحك صاحبي وقال:

- ماتيجي نتمسك ظلم.

قلت له:

- ماتيجى

هههههههههههههههههههههههههههه

ماشاء الله انت واضح انك بتحب تامر حسنى جدااااااااااااااااااااااااا

ههههههههههههههههههههههههههههه

هههههههههههههههههه

انا نفسى اعرف هو عاملك ايه بس

ده حتى عسل واغانيه روعه وصوته حلو اوى Embarassed

لو سمعته وركزت بس هتحبه خالص Embarassed

مشكوووووووووووورين نورتو الصفحة
هو الصراحة عسل وجميل دا وصوتة حلو واغانية لذيذة وحرامى ونصاب ولطيف ورخم مافيش حاجة مش موجودة فية هههههههههه

هههههههههههههههههههههه
والله يا حسن انت عسل هو فعلا فيه كل الصفات مش ناقصه حاجه بجد موضوع حلو ولذيذ بس كل الناس دلوقتى كده هنعمل ايه يعنى